"La okulsano de kamparaj infanoj en Ĉinio ne estas tiel bona, kiel multaj imagas," diris gvidanto de konata tutmonda lensfirmao.
Fakuloj raportis, ke povus esti multaj kialoj por tio, inkluzive de forta sunlumo, ultraviolaj radioj, nesufiĉa endoma lumigado kaj manko de okulsaneduko.
La tempo, kiun infanoj en kamparaj kaj montaraj regionoj pasigas per siaj poŝtelefonoj, estas ne malpli ol tiu de iliaj samrangaj infanoj en urboj. Tamen, la diferenco estas, ke multaj vidproblemoj de kamparaj infanoj ne povas esti detektitaj kaj diagnozitaj ĝustatempe pro nesufiĉa okul-ekzamenado kaj diagnozo, kaj ankaŭ pro manko de aliro al okulvitroj.
Kamparaj malfacilaĵoj
En iuj kamparaj regionoj, okulvitroj ankoraŭ estas rifuzataj. Kelkaj gepatroj opinias, ke iliaj infanoj ne estas talentaj akademie kaj estas kondamnitaj fariĝi farmlaboristoj. Ili emas kredi, ke homoj sen okulvitroj aspektas kiel kvalifikitaj laboristoj.
Aliaj gepatroj eble diros al siaj infanoj atendi kaj decidi ĉu ili bezonas okulvitrojn se ilia miopeco plimalboniĝas, aŭ post kiam ili komencas mezlernejon.
Multaj gepatroj en kamparaj regionoj ne konscias, ke vidmanko prezentas severajn problemojn por infanoj se ne oni prenas mezurojn por korekti ĝin.
Esplorado montris, ke plibonigita vidkapablo havas pli da influo sur la lernado de infanoj ol familia enspezo kaj la eduknivelo de gepatroj. Tamen, multaj plenkreskuloj ankoraŭ miskomprenas, ke post kiam neplenaĝuloj portas okulvitrojn, ilia miopeco plimalboniĝos pli rapide.
Krome, multaj infanoj estas prizorgataj de siaj geavoj, kiuj havas malpli da konscio pri okula sano. Kutime, geavoj ne kontrolas la kvanton da tempo, kiun infanoj pasigas sur ciferecaj produktoj. Financaj malfacilaĵoj ankaŭ malfaciligas por ili aĉeti okulvitrojn.
Komencante pli frue
Oficialaj datumoj pri la pasintaj tri jaroj montras, ke pli ol duono de la neplenaĝuloj en nia lando havas miopecon.
Ekde ĉi tiu jaro, la Ministerio pri Edukado kaj aliaj aŭtoritatoj publikigis laborplanon implikantan ok rimedojn por preventi kaj kontroli miopecon inter neplenaĝuloj por la venontaj kvin jaroj.
La mezuroj inkluzivos malpliigi la akademiajn ŝarĝojn de studentoj, pliigi la tempon pasigitan pri subĉielaj aktivecoj, eviti troan uzon de ciferecaj produktoj, kaj atingi plenan kovron de vidmonitorado.
